Espésial dédikas ba lé kakolè France-Antilles
— Par Daniel M. Berté —
Avan, pou chajé tré
Oben pannié-won plen
Ou té ka di vwazen
An ti lanmen souplé !
Lè motè’w arété
Ou bizwen an balan
Ou ka di an pasan
An ti lanmen souplé !
Lè lé zafè mélé
Ou ka mandé koudmen
Ou ké rimèt dèmen
An ti lanmen souplé !
Paw solidarité
An lanmen lavé lot
Fo rété yonn-a-lot
An ti lanmen souplé !
Lè an média koulé
Sé an vwa ki pèdi
Pou la Démokrasi
An ti lanmen souplé !
Pou nou pé sa sové
Dé lespas dèksprésion
Epi d’édikasion
An ti lanmen souplé
Pou Pèp-la progrésé
An domenn la matjans
Dizans ek transmétans
An ti lanmen souplé
Jounal, radio, télé
Si nou kité-yo mò
Nou ké vini mwen fò
An ti lanmen souplé !
Lè ni yonn ka pijé
Kolé tèt ek zépol
Pou i pa pran lavol
An ti lanmen souplé !
Nou ni mwens libèté
Lè nou ni mwens média
France-Antilles an konba
An ti lanmen souplé !
Daniel M. Berté 251019