— Par Daniel M. Berté —
Menm si’w kon juiféran
Ou ka ba lari chenn
Ou ka mandé chen pen
Pas dé poch-ou krévé
Wou tou… ou sé Moun tou
Menm si’w kon griyav vet
An didan djel an bef
Ou dé digré pli ba
Ki an kabann vètè
Wou tou… ou sé Moun tou
Menm si’w pran wonm pou soup
Epi ou ka tété’y
Ka trennen an dalo
Ka santi makriyo
Wou tou… ou sé Moun tou
Menm si ou pèd lakat
Epi’w touni an tet
Ek pran Mango Vilsen
Pou lotel katétwal
Wou tou… ou sé Moun tou
Menm si’w vòlè poul moun
Ek yo fouté’w lajol
Pas an jou pié’w glisé
Ek ou pèdi kontrol
Wou tou… ou sé Moun tou
Menm si lavi fouté’w
An sakré bel kalot
Ki fanmi’w rijété’w
Epi grann méprizans
Wou tou… ou sé Moun tou
Menm si’w an délala
An poud, an fin pousièr
An chien ou an kaka
Oben an chingpontong
Wou tou… ou sé Moun tou
Menm si’w an fon ladèch
Man ka kriyé’w Misié
Lonnè’w épi respé’w
Pas kelkanswa léta’w
Wou tou… ou sé Moun tou
Daniel M. Berté 150321