— Par Daniel M. Berté —
Nouvel-a tonbé (Ba Viktò…)
An siel blé, blé-blé-blé
San pies ti niyaj blan
An ti van lalizé
Ka souflé karésan
Zeb, plant épi piébwa
Lanati verdwayan
Bet, moun toutalafwa
Ka viv an tjè kontan
Pa té ni bwi-kouri
Ni pies endikasion
Pa té ni pies ti-kri
Pies anonsiyasion
Epi tou sibitman
Epi tou soudènman
Epi tou briskeman
Epi tou britalman
An kout tjok plis kalot
Tousa pa osi red
Kout woch, kout ba-lapot
Tousa sa poko red
An gran déflagrasion
An gro détonasion
An papa esplozion
An sakré déblozion
Lespri défolmanté
La pansé déjwenté
Servo dépotjolé
Kò dékalfonsé
Tet pété tjè félé
Lafanmi dézolé
Tjè pété tet félé
Zanmi débousolé
Nouvel-a tonbé
Ou sav ki I pati
Nouvel-a tonbé
I alé I pati
I pati Abolày
Monté an Galilé
Foukan kay Met Bazil
Vwayajé kay Man Moun
26/10/26 Lire Plus
