— Par Daniel M. Berté —
Kriz ki pli potalan ki pli gran Katastròf
Katastròf ki ka fè tout péyi fè Kòchma
Kòchma ki ka tounen an vré Koko-makak
Koko-makak a résoud pou dékalé Kovid
Kovid 19 moun ka trapé’y paw lé Kontak
Kontak ant moun ek moun lè yo ka fè Kalen
Kalen fo évité menm épi la Kopin
Kopin a fè tjilé si’y lé Kolé-séré
Kolé-séré pa fèt ; Annou wè pou Kisa
Kisa ki fo nou fè pou pé konbat Kovid
Kovid pou sa koré san nou pété Kabèch
Kabèch ki ka chofè kon an kalbas Katjil
Katjil ki fo nou fè pou aji Komifo
Komifo, annou wè ki maniè Koumansé
Koumansé pa rété plasé an Konfinman
Konfinman ki vé di fo rété a Kay-ou
Kay-ou, pa kay vwazin pou sa fè’y Konfidans
Konfidans sé bagay ki ka mennen Kontak
Kontak fo évité’y ; Gouvèlman ba’y Konsèy
Konsèy : lavé lanmen trè souvan Kòmilfo
Kòmilfo pou pé sa évité Kontajion
Kontajion fo blotjé’y : sé bagay Kapital
Kapital di tousé-étèwnié an Koud-ou
Koud-ou pou sa frennen la Kontaminasion
Kontaminasion sé poulbwa ki yo kriyé Kovid
Kovid ki oblijé mond antié pran Konsians
Konsians ki ka fòsé tout moun Koopéré
Koopéré pou pé fouté’y an bel Kakan
Kakan si nou pa lé sé’y ki Kapoté-nou
Daniel M. Berté 160320