— Par Daniel M. Berté —
Man wè ek man tann trop
Man boufi épi mové nouvel
Man ni asé, man plen
Ek man ka débòdé
Ki anlè lé jounal oben télé-radio
Asou radio-fey-chou o lé rézososio
Mové nov ka fann tet-mwen
Ek ka sivotjé-mwen
Nou sibi lakovid, anba sargas woté
Klordékòn prézonnen, kansè sé pa palé
Brim-de-sab san manman, ladeng ka dékalé
Nou ka sòti an sann pou tonbé an difé
Lé migran ka néyé an Méditèrané
Larisi ek Likrèn fè an ladjè pété
Yo pòkò négosié pou yo sa fè lapé
Amas ek Israel ka fè lé zanm palé
Lè sé pa laséchres ki ka limen difé
Sé lapli ek siklòn ka krazé ka brizé
Adan Lamazoni YO ka ratibwazé
Tanpérati mondjal ka monté ka grenpé
Lenflasion débatjé, lé pri ka ogmanté
An lari, an tribin rasizm ka dévlopé
Ritrété anmerdé pou yo pé sa manjé
Lé chomè ka pléré pou ni an ti zagré
A prézan a tout lè ni dé moun ka tiré
Ek sa ki dézolan sé dé jenn ka tonbé
Ek tousa pou kisa !? An pawol !? An gadé !?
A manmay nou mélé ! Eti nou ka alé ?
Pou trapé sa’y ni dwa, djoubakè ka grévé
Pou an ti déplasman lawout anboutéyé
Kon patjé lédjim-soup tout laviya maré
Man plen man ni asé, tjè-mwen ka débòdé
Daniel M. Berté 31123