A ! Papa !

— Par Daniel M. Berté —
Mantjé tonbé sé bel pa
Si’w pa tonbé papa
Ou tonbé an zo-mwen
Pou té fè-mwen fè pa

A ! Papa !
Fè-mwen fè prèmié pa
Ti-pa apré ti-pa
Lè mwen té tou-piti
Ou asiré lé pa

A ! Papa !
O moman lé glisad
Ou toujou la Papa
Pou sa pòté an pal
Anpéché lé traka

A ! Papa !
Lè mwen di sa-va-pa
Ou ka di alte-la
Si’w pa pé di’w pé pa
Mé tanté fè an pa

A ! Papa !
Sa’w toujou di Papa
Sé pa pòté pépa
Ki ka fè’w fè bel pa
Sé manniè’w ka fè pa

A ! Papa !
Ou bien répété sa
Pa kribich, i fo pa
Si’w pa lé raté pa
I fo pa soté pa

A ! Papa !
Pa chasé, pa kwazé
Fo évité fè sa
Kanta pa chat mawon
Sa, janmen i fo pa

A ! Papa !
Ou toujou di Papa
Pa lapenn fè gran pa
Maché a piti pa
Ek alé pa-za-pa

A ! Papa !
Ou di’m lison Sézè :
« An pa, an lòt pa,
Ankò an lòt pa
Epi genyen chak pa »

A ! Papa !
Jòdi sé fèt papa
Sa mwen pé di’w Papa
Ki man anmen’w Papa
Paske sé wou Papa

Daniel M. Berté 50619