Lè lavi-mwen…
Lè lavi-mwen blotjé an gran-chimen kèsion
Epi rété kwensé an kannal ladévenn
Pou ouvè lespérans
Pou mwen pé ba’y douvan
Man ka ritann Gran Manman
Lè lavi-mwen doubout an mitan an lannuit
Ka chèché lékilib anlè fil lanmizè
Pou rété an konsians
Pou pa trennen atè
Man ka rili Gran Sézè
Lè lavi-mwen blotjé dèyè gro pil woch-la
Paré a néyé kò’y an gran lanmè blé-a
Pou ripran an balans
Pou ritouvé larel
Man ka rili Gran Zobel
Lè lavi-mwen asiz anlè ti-ban katjil
Ek ka pléré gro-tjè plonjé adan malè
Pou genyen délivrans
Pou pa fè mové-san
Man ka rili Gran Glisan
Lè lavi-mwen kouché an kabann la détrès
Ka goumen pou pa mò adan gouf ladoulè
Pou trapé an ti-chans
Pou mwen pé sa di non,
Man ka rili Gran Fanon
Lè lavi-mwen maré épi lienn lasoufrans
An fenfon an lajòl éti ka mantjé lè
Pou pé fè pénitans
Man ka ritann Gran manman
Di-mwen : « Kouté lé Gran »
Daniel M. Berté 80419