— Par Daniel M. Berté —
Zot ki ba-nou lavi
Chasé tou no sousi
Pou-nou té réyisi
Nou ka di-zot mèsi
O lé manman !
A janmen an tjè-nou
Zot ki ba-nou manjé
Brè lavé ripasé
Anlè sonmey véyé
Lè-nou malad swagné
O lé manman !
A janmen an tjè-nou
Zot ki aprann-nou di
Bonjou bonswè mèsi
Salié tout lé zanmi
Osi lé zenkoni
O lé manman !
A janmen an tjè-nou
Zot ki travay an kann
An jaden an bannann
O marché té ka vann
Pout té sa ba-nou viann
O lé manman !
A janmen an tjè-nou
Zot ki pousé lékol
Pou-nou té pran lanvol
Pou-nou té ni bon rol
Dan an lavi ki fol
O lé manman !
A janmen an tjè-nou
Zot ki té ka trimen
Gran bonnè-bon-maten
Trapé mal-do mal-ren
Pou té sa ba-nou pen
O lé manman !
A janmen an tjè-nou
Zot ki fè lenstriksion
Vréyé-nou lésision
Fè-nou fè atansion
A fè dé bòn’aksion
O lé manman !
A janmen an tjè-nou
Zot ki ba-nou larel
Pou té rété fidel
O valè ésansiel
Ka ba’y bon potansiel
O lé manman !
A janmen an tjè-nou
Zot ki fè-nou aprann
Sé pa tou-di bel ganm
Ka fè vré nonm vré fanm
Ki fo-yo ni bon nanm
O lé manman !
A janmen an tjè-nou
Zot ki ba-nou lavi
Chasé tou no sousi
Pou-nou té réyisi
Nou ka di-zot mèsi
O lé manman !
A janmen an tjè-nou
Daniel M. Berté 20523