Maren-péchè
(Ba lé Adémar)
— Par Daniel M. Berté —
Maren-péchè de bònimè
Ek yo anmen alè lanmè
Maren-péchè lévé bonnè
Pou pati alé an lanmè
Sé pa boug ki ka gadé lè
Pas trava’y pa ka fè yo pè
Yo ka fè bon lajan délè
Lè yo mennen an ban atè
Ki yo ka vann ba lé achtè
Sa ka fè maché lé zafè
Maren-péchè ka pran bon fè
Men yo paka ladjé lanmè
Men si lapech pa ba’y an lè
Yo pa ka rété ka bat bè
Yo ka sanblé kon sè ek frè
Pou pé sa rédi senn atè
Nas-yo malonnet ka vòlè
Klòwdèkòn ki désann lanmè
Park natirel maren ouvè
Ni tousa ka fouté-yo fè
Maren-péchè pa flègèdè
Yo tout sé frè anlè lanmè
La pech chadron sé kontrolè
Rol a péyé sé gran bonnè
Kannot filet épi motè
Tousa ka rivini tro chè
Men sé pa moun ki plewnichè
Pas yo ni kouraj ek yo fyè
Dan la dévenn kon la doulè
Yo pa ka met jounou atè
Maren-péchè pa tjoupèpè
Ek yo toujou ka bat lanmè
Yonn ka jwenn Met Bazil délè
Pas pa ni branch an gran-lanmè
Ek lafanmi é lé konpè
Ka pléré jiska néyé tjè
Mé sa ki pran kalot Malè
Poutan pa ka rété tèbè
Sé pa moun ki ka fè lèlè
Yo ka goumen pou pé wè klè
Maren-péchè dèmen kon yiè
Ka’y kontinié alé lanmè
Daniel M. Berté 60717