— Par Daniel M. Berté —
Lanmen ka kaliné épi ka karésé
Sé limenm ka chanjé, ka vini anrajé
Epi ki ka ba’y kou
Tou piti ou sirè ek ou pa ka kouté
Dé ti-kou anlè tet épi dé dwet pliyé
Ou pran an ziginot
Si’w sé an ti-sirez ka toujou kontesté
Ant lepous é lendeks lapo’w yo ka tòdé
Sa sé an pichonnad
Lè ou alé lékol, ou pa sa résité
Lison ou mal aprann, pou chak mo ou mantjé
Met ka ba’w an ziktok
Ou antré lésision men ou pa sa prédié
Sé la ou ka santi plat-lanmen an labé
Yo kriyé sa kalot
Si’w éséyé palé pou pé sa protesté
Ou ni an lot model ki sa fè’w arété
Tala sé do-lanmen
Ou vini kontrolè, ka fè papa’w faché
An kalot a lalé, do-lanmen an viré
Sa sé palaviré
An lafet kominal, an sèbi mal pasé
An gro kou anba kou épi pous ékarté
Tala sé an gojet
Dan an lévé-fésé adan lawon danmié
Mové kou ka rivé, mové kou ka tonbé
Pami i ni kakan
Lè ou trapé konba épi mové sijé
Ou ka fèmen lanmen, lé senk dwet ripliyé
Pou pé sa fè an tjok
Ek si ou prézidan, men ou pa aprésié
Opozan an fidji’w, lanmen’y ka balansé
Lòtbo, sa sé an jif
Kon kouto a dé lanm, lanmen bon ek mové
Sé li ki ka sové, men sé li ki ka tjwé
Respekté an lanmen !
Daniel M. Berté 100621