— Par Daniel M. Berté —
Sété an tan krab té lé fè élèksion
Yo fè an gran sanblé pa bò la Krabestèw…
Zagaya déklaré ki dé mal krab pa ka viv adan an menm tou
Sirik-jòn afirmé ki tout krab konnet tou yo
Touloulou-rouj asiré ki zo sirik pa ka fè soup
Koutja di ki tout krab ka mò an marinad
Sémafot prétann ki sé bon tjè krab ki ba’y do an fè
Krab-mal-zorey asiré ki fo toujou ou ba krab bien manjé pou ou manjé’y apré
Krab-blan konstaté ki maya té ba kayali mal-vant, magré sa kayali ka valé’y
Maya prédié : « O nom dé krab-farsi, dé zékal-krab, é dé matoutou-krab, Amenn ! »
Papa-krab lévé faché : « Bann malkrab kouyon, sa bout ! arété vo krabionri !
Si nou lé vini a bout, dé krabis, dé krabié, dé krabiolè, é ot krabiolog ek krabiolis,
Fo nou arété fè krabionad, (kriyonnad krab), sinon nou tjou-tjout !
Sé kaka krab ki an tet zot alow?!
Fo réfléchi !!! sinon, tout krab-la ka’y mò an bari-ya ! »
(Men… krab pa ni tèt… I pé pa réfléchi!)
Mantou réponn : « Jistiman, fèmen djol zot ! Rété an tou zot!
Sé trop palé ki fè krab pa ni tet… ek ka fè’y fini an fétou lé Lendi Pak»
Gro-mòdan, ki pa boug ka fè krab, rigolé : « érèz-di-bonnè ki krab pa ni latjé !
Sinon yo té ka’y kon sèpan ka mòdé latjé yo ! »
Sokan Gwadoup di an tjè’y : « Hon ! biten-la-sa sé an vré pannié-a-krab !
An-an!… Trop kankan !… An pa an sa menm!
An ka pran kan an mwen… An ka foukan misié Likan! »
Lézot osi foukan vitman adan tou-yo
Dépi jou tala pani krab ki mè…
Ni mè ki krab dayè !