— Par Daniel M. Berté —
Anlè an group Watsap personnaj kannaval
Té pran kom diskision si fok kouri vidé
Prèmié ki esprimé sé Medsen-lopital
Kovid tro séléra, Manmay fo pa alé !
Moko-zonbi matjé ki I pa pè misié
Pé pa kontaminé lè’y anlè échas-li
Vidé-a sé ta nou fo kouri an lari
Kovid ou pa Kovid, Manmay fo nou alé !
Karolin-zié-kokli di i bien anmerdé
Mari’y za tro boulé épi boug-la grosi
Pandan konfinman-an i pa té ka soti
I manjé trop, i lou, Manmay fo pa alé !
Matlo-sou ek konpè’y misié Brosé-kléré
Argimanté anlè an zafè tradision
Ki apré konfinman fo ni dékonprésion
Pou moun pa ped lakat, Manmay fo nou alé !
Es zot sonjé malad ki ni difikilté
Lé swagnan ki mélé pas yo mantjé mwayen
An lanné san vidé pou nou sa pa ayen
Déklaré Lom-san-tet, Manmay fo pa alé !
Ladjables bien faché di sé lè pou’y chayé
Epi pété lonba yonndé nonm vakabon
Menm si lavi-ya red, menm si Kovid pa bon
Soté chanté kriyé, Manmay fo nou alé !
Lé-zom-darjil ansanm di yo pa ka boujé
Lavi tro difisil, lasanté pa ni pri
Pou an moman lajwa, yo pa lé rété pri
Fè lé fanmi pléré, Manmay fo pa alé !
Makoumè ek Malprop, yo lévé anrajé
Kimafoutiésa ! Kannaval sa vital
Fo désann an lari pou an bel bakannal
Nou sé dé Bann-zawa, Manmay fo nou alé !
Mariann-lapo-fig mété kòy a matjé
Filé-kouto za mò, pèsonn pa fè Bwabwa
Ni éleksion dé Ren, lé Bradjak djòlanba
Pa lapenn fè djendjen, Manmay fo pa alé !
Menmsi I pa ka’y ni lafoul ki dédjizé
Ni Mariaj biwlesk épi lé Travesti
Nou pou ni dé Djab-rouj ka soté an lari
Afirmé Mas-lanmò, Manmay fo nou alé !
Anlè group Watsap-la man rété makrélé
Man pa wè Papa-djab ni lé Nèg-gro-siro
Vaval pòkò di ak, sé ki bagay-la cho
Ek Zot sa zot ka di ? Alé ou pa alé ?
Daniel M. Berté 90221