Pétrol
An gro tet jòn-fol
Ki ka jwé pliziè wol
Mété limond an bòbol
Pou an zafè pétrol…
Sa pa drol !
Epi konpè’y ki pa boug mol
Yo ladjé bonm anlè lékol
Tjenbé détwa Dowmuz pa kol
Fouté Kiba dan an lajol…
Sa pa drol !
Yo fouté péyi an lakol
Désann lékonomi an vol
Di nò o sid ant lé dé pol
Tousa pou an zafè pétrol…
Sa pa drol !
Zopozan ki lé fè kakol
Kisiswa Pyè kisiswa Pol
Pyé-yo maré dan an ti-bol
Ek yo ka pèdi lapawol…
Sa pa drol !
Militan ka pòté bandrol
Ki ka di non kon espagnol
Men sa sé bagay dimi-mol
Douvan gro posédan pétrol…
Sa pa drol !
Rézistan ka montré majol
Kon zandoli anlè fey tol
Ni ki ka di mété bémol
Dot ki préféré fèmen djol…
Sa pa drol !
Pou lapéti an boug tet fol
Ka fè sa’y lé san piès kontrol
Ek ki la ka fè le mawyol
Tousa pou an zafè pétrol…
Sa pa drol !
Daniel M. Berté 290426