(Espésial dédikas ba lé fanm ki di non)
— Par Daniel M. Berté —
Yo té ka di sé yich démon
Davwè i té nwè kon vonvon
Dapré lé granjan de salon
Mé siwtou i té sa di non
I té ka fè kon jenn gason
Soté maté ek pran plonjon
I té sa goumen kon laron
Ek siwtou i té sa di non
Lè an moun té vréyé an fion
I té ka doubout o filaplon
An ladjè épi vakabon ?
La siwtou pa té ka di non
Dan konba-djol pou ni rézon
I té ni argimantasion
I pa té moun konparézon
Mé siwtou i té sa di non
Radi adan konversasion
I pa té manchot an-aksion
Toujou paré pou ba’y baton
Pas siwtou i té sa di non
Té di lonnè pou Neg mawon
Pou lé kakolè ki pran plon
Tousa ki za monté o fron
Mé siwtou ki té ka di non
Té ni respé pou dé gran non
Che Guevara an gran patron
Nelson Mandela an prizon
Pas siwtou yo té sa di non
I pa té ka sibi présion
Ni nonpli entimidasion
I té rèn la kontestasion
« Rèbel » manzel té ni kom non
Daniel M. Berté 20012