— Par Daniel M. Berté —
Ladjé kò… débayonné
détòtiyé
délivré pran dot larel… Pati !
Pati pou chèchè kò’w
Pati pou risanti kò’w
Pati pou ritouvé kò’w
Ladjé kò… démélé
dézanpétré
détaché dousman vit… Wondi !
Wondi an kwen lari lespri lib
Wondi lakanpan’y lespri lib
Wondi bòd-lanmè lespri lib
Ladjé kò… délèsté
démaré
dégajé red mawto… Kouri !
Kouri douvan an bel lawout
Kouri an souplès mé atout
Kouri san pèd souf jik anbout
Ladjé kò… dékolé
désoudé
dékadnasé lésé alé… Najé !
Najé kon pwason an dlo
Najé alèz anlè dlo
Najé flouz anba dlo
Ladjé kò… dérasiné
déchouké
dézankayé pou viv… Volé !
Volé kon zwézo an gran van
Volé kon sèwvolan mawot an van
Volé kon lespri Libèté adan van
Ladjé kò… débridé
désélé
détaché san krent… Rigolé !
Rigolé pou ni bòn santé avan
Rigolé pou belbon lanmizman
Rigolé pou lavi bel-bel douvan
Ladjé kò… dékonprésé
déstrésé
dézapiyé lévé lanmen… Woulé !
Woulé kò-zot zanmi-vwazen
Woulé kò-zot épi anmen
Woulé kò-zot an Démil-ventéyen
Ladjé kò… Pati ! Wondi ! Kouri ! Najé ! Volé ! Rigolé ! Woulé ! Ladjé kò…
Daniel M. Berté 41220