— Par Daniel M. Berté —
Kimafoutiésa !? Koré Kréyol konsa !?
Kèlekeswa kaw fè pou korijé mwen
Man ka’y kontinié kozé Kréyol
Kwatès !? Kisaw kwè !? Kisaw konprann !?
Sakré kalté koumandè kontrolè kiw yé !
Kelkiswa kout-zié
Kisiswa kout-lang
Kelkanswa kout-djòl
Kekswa kout-kankan
Koumansifè !? Kapoté Kréyol konsa !?
Kèlekeswa kaw fè pou kontré mwen
Man ka’y kontinié kozé Kréyol
Keskiya !? Kisaw konprann !? Kisaw kwè !?
Sakré kalté kolokoto kriyonnè kiw yé !
Kelkiswa kout-règ
Kisiswa kout-lienn
Kelkanswa kout-baton
Kekswa kout Dirandal
Kimafoutiésa !? Kasé Kréyol konsa !?
Kèlekeswa kaw fè pou kadré mwen
Man ka’y kontinié kozé Kréyol
Kisa ki ni !? Kisaw kwè !? Kisaw konprann !?
Sakré kalté konparézon krititjè kiw yé !
Kelkiswa karès
Kisiswa kalen
Kelkanswa koulé
Kekswa koultans
.Koumansifè !? Klwazonnen Kréyol konsa !?
Kèlekeswa kaw fè pou kazé mwen
Man ka’y kontinié kozé Kréyol
Kisa’y yé !? Kisaw konprann !? Kisaw kwè !?
Sakré kalté koubarè konplotè kiw yé !
Kelkiswa kolè
Kisiswa kriyé
Kelkanswa kalòt
Kekswa kout-pié
Kimafoutiésa !? Krazé Kréyol konsa !?
Kèlekeswa kaw fè pou kontrenn mwen
Man ka’y kontinié kozé Kréyol
Keskispas !? Kisaw kwè !? Kisaw konprann !?
Sakré kalté kolonialis konspiratè kiw yé !
Daniel M. Berté 101017