—Par Danniel M. Berté —
Délè, parfwa, de tanzantan
Lè mwen ni an ti-moman-tan
Man ka gadé pasé tan-an
Sé an bagay trè étonan
Délè i ka pasé kon van
Kon lalizé ka ay dousman
Dot lè i ka bouwé briskan
Kon siklòn épi gran balan
Dayè mwen-menm an kèsionan
Es ou ka wè’y pasé kon jan
Oben kon matériel roulan
Sé pa bagay ki djè vwayan
Délè ni ka di ki yo pa ni tan
Man ka touvè sa siwprenan
Pas man observé trè souvan
Sé yo menm ki pa lé pran tan
Dayè mwen-menm réfleksionan
Ka mandé si yo pé pran tan
Epi dé lanmen sézisan
Délikatman ou an pijan
Délè ni ka miziré tan
Yo jis envanté enstriman
Ki parfwa pli-zou-mwen savan
Pou yo pé dékoupé tan-an
Délè moun trè imajinan
Sèvi soley épi kadran
Dot lè sé dé zédjui tournan
Oben sé dé chif défilan
Dayè pou bien kadré tan-an
Yo divizé’y an dé moman
Lè, minit, ek sigonn-tan
Jou, simenn, mwa, jour de lan
Délè ni moun konkipisan
Ki toujou pré a vann tan-an
Ki ka répété toulitan
Le tan, le tan sé de larjan
Délè i kon zétwal filan
Ek lé moun ki pa observan
Ka di an manniè rigrétan
Ki yo pa wè pasé tan-an
Délè men sa sété avan
Ni yonndé moun dézoblijan
Ka di ki matjé anlè tan
Misié Berté, sé an ped tan
Dayè ou pé rété santan
Ka pawolé anlè tet tan
Sèten tan ké toujou fè tan
Ek tan ké toujou kité tan