— Par Daniel M. Berté —
An laviya, lé sa ki, sé yo
An laviya, lé sa ki
ka brilé
lavi paw lé dé bout
ka woulé
a dé-san anlè tout vié lawout
ka kontinyé
fonsé san krent épi san dout
sé yo ki ka siwviv
An laviya, lé sa ki
ka alé
ek ka ba lari chenn
ka éré
touléjou kondi an nanm an penn
ka viré
san ayen kon an konkonm san grenn
sé yo ki ka déviv
An laviya, lé sa ki
ka pléré
pou an wi pou an non
ka lonjé
an lanmen pou vòlè an bonbon
ka anvyé
sa ki bon ek menm sa ki pa bon
sé yo ki ka souviv
An laviya, lé sa ki
ka rigolé
apré an gro malè
ka aprésyé
brè dlo an mitan an dézè
ka ritouvé
lé paran lé yich lé sè ek frè
sé yo ki ka riviv
An laviya, lé sa ki
ka fronté
tout lé sitiyasion
ka touvé
pou vansé toujou an solision
ka lévé
ek ka viv lavi épi pasion
sé yo ki ka viv
Daniel M. Berté 190526