Kankan milan ek chui-chui-chui
— Par Daniel M. Berté —
Kankan milan ek chui-chui-chui
Pa koté lakay-nou sé an spow nasional
Kankangnez otjipez pandan tout lajounen
Anlè do lafanmi, lé zami, lé vwazen
Milannez soutirez ka rakonté zafè
Anlè tet nonm kon fanm ka di sa yo pa wè
Chui-chui-chui san fè bwi, ka palé épi fwa
Mété bouch anba bra, ek sé pa pawol swa
Kankangnez bien alez adan radio-fey-chou
Ka kòlpòwté anchay tou lé jou ki fè jou
Milannez annafez vini modernizé
Yo kité kwen-lari, délésé lé mawché
Chui-chui-chui, chui-chui-chui, véyé zafè lézot
Pawol janbé finet ek soté pa lapot
Malpawlez jòdijou dan média ofisiel
Séré dèyè pòwtab ka dévèsé bon fiel
Epi lé nouvel mod, yo anko pli fetchiez
Yo jis chanjé non-yo ek yo ka fè bon djez
Tanto yo fesboukez, dot lè enstagramez
Yo osi gran twitez, rèn rézo-sosioez
Daniel M. Berté 91118