— Par Daniel M. Berté —
Man ka kouri lannuit
Pou bonmaten lévé
Adan an lawouzé lespwa
Ba tiyanmay gazawi
Ki latranblad ka pran
Latranblad kakarel
Anba bonm ka tonbé
Akondi siel krévé
Ek ki ka déblozé
Anlè tet-yo touni
Adan an rev krévé
Kon izotewm krévé
Kondi filé krévé
Ki pran pwason krévé
Man ka kouri lannuit
Man ka kouri lannuit
Dan lapli bètafé
Ka mété an klewté
Dan lisidité-mwen
Dan lenpidité-mwen
Tout kakolè ka fè kakol
Tout konbatan ka konbat
Epi an lespri powézi
Pou di sa yo pé pa di
Men ki alantou-nou
René Char, an rézistan
Che Guevara, an rézistan
Nelson Mandéla, an rézistan
Ejèn Mona, an rézistan
Yo tout ka kouri lannuit épi mwen
Daniel M. Berté 100225