— Par Daniel M. Berté —
Lé bonmaten dépi’w lévé
Avan tout bèt fini priyé
Apenn solèy ka ouvè zié
Ou ka mété kò’w a palé
Avan ayen ou za paré
Ou poko onoré Bondié
Ajijéwè koulé kafé
Ou za ka koumansé palé
Toujou parèy ou balansé
San fè kontak ou démaré
Ou za paré pou fè moun chié
Yen ki palé ou ka palé
Sé konsa tout lasent jouné
Kon an rara ki ka touné
Kon mèl a sisèdswè an palmié
San arété ou ka palé
Mé Bondié-Sényè sa sa yé
Ou sé di an moun yo piayé
An kochonni yo ba’w manjé
Pou’w pé palé otan palé ?
Mé a ki moman ou ké pé
Pou sa fouté tout moun lapé
Titak silans man lé souplé
Pou an moman, rété palé
Es sa vré ki ou pa lé
Kité bwèt-a-chiko’w pozé
Ek kabèch-mwen san résonné
Epi bwi djòl-ou ka palé ?
Man ka mandé Mondié souplé
An ti favè fo’y akòwdé
Pou I kité-nou respiré
Ek aresté tann-ou palé
Toulong sé an sel wélélé
Si’w pa adan an bougonné
Ou an mitan an babiyé
Oben dan milan ka palé
Menm an dòwman ou ka palé
Ki tan mafi ou ké ladjé ?
Lanné tala man ka swété
Ou moli an may dan palé
Daniel M. Berté 20120