— Par Daniel M. Berté —
Man ka lévé
Ou za ba-mwen bon kalot
Fè tet-mwen tounen douvan-dèyè
Konsi larivyè Lakapot
Ka monté Mòn Balé an awryè
Ou za fouté-men bel gojet
Fè-mwen tonbé anlè bonda
Ek trapé an kalté falfret
Ki kité-mwen an dézawa
Ou za ba-mwen met kakan
Fè-mwen makaté djòlanba
Epi pèdi tout balan
Ek vini kon an ababa
Magré tousa
Man…
Ou za ba-mwen palaviré
Bat-mwen kondi an vié lanbi
Epi fè-mwen kriyé anmwé
Ek fè-mwen rété bigidi
Ou za ba-mwen model kout-pié
Fè-mwen drivé anlè do
Epi pété bò lé dé zié
Ek osi kasé yonndé zo
Ou za fouté-mwen bon kout-tjok
Fè-mwen maté adan dalo
Mantjé fè-mwen vini enpiok
Epi rann-mwen kon an zéro
Magré tousa
Man ka…
Ou za ba-mwen mové kout-koud
O pwen di pété-mwen larat
Fè-mwen santi konsi lafoud
Ki tonbé ek fè’m ped lakat
Ou za fouté-mwen kout-jounou
An bouden ek an lestonmak
Akondi sé dé kout boutou
Ka tonbé anlè mal makak
Ou za ba-mwen kalté kout-tet
Fè-mwen pèdi lakat marin
Men jòdiya sa pa ka’y fet
Paske dlo dépasé farin
Magré tousa
Man ka lévé !!!
Daniel M. Berté 220825