Latret nef 

— Par Daniel M. Berté —

Antan lontan YO fè Neg janbé loséan
Sa ki té fè kakol, YO fouté yo adan
Jòdijou Pasaj Nwè sé Méditèrané
Dot nèg ka mò néyé an Méditèrané

Kapitenn négriyé fann tjou neg wouspétè
Isalop atjòlman ka fou neg an malè
Neg paré pou janbé la Méditèrané
Nèg mélé ka néyé an Méditèrané

Kannot gonflab pran plas brik épi gowélet
Vié bato ranplasé frégat épi kòwvet
Nèg koulé pou janbé la Méditèrané
Nèg san bwé mò néyé an Méditèrané

Lé pasè kriyonnè pran plas lé négriyé
Lé vòlè magouyè ranplasé awmatè
Nèg péyé pou janbé la Méditèrané
Nèg abizé néyé an Méditèrané

Trafitjan pou lajan ka vann moun ozanchè
Omdafè san manman ka vann nonm pou pa chè
Nèg kriyé pou janbé la Méditèrané
Nèg maléré néyé an Méditèrané

Avan YO chayé Neg pou té fè riches YO
Jòdi YO pa lé Neg bòdé bò lapot YO
Sé poutji Neg ka mò an Méditèrané
An boul Neg ka néyé an Méditèrané

Avan sété esklav YO té ka kriyé yo
Aprézan sé migran ki ka désignen yo
Men sé Neg ka pran fè an Méditerané
Ek sé Nèg ka néyé an Méditèrané

An lo péyi Léwop kolonizé Lafrik
Chayé Neg dan latret pou YO té sa fè frik
Pou YO Neg pé sonbré an Méditèrané
Pou YO Neg pé néyé an Méditèrané

YO sèvi an lo Neg lè lé ladjè pété
YO sèvi yo osi pou té sa rilévé
Jòdi Neg pé pléré an Méditèrané
Jòdi Neg pé néyé an Méditèrané

Listwa ka bégéyé men i ka répété
Ek i ka déwoulé an direk latélé
Loséan Latlantik senmitiè Neg Lafrik
La Méditèrané senmitiè Neg Lafrik
Daniel M. Berté 170918