— Par Daniel M. Berté — 
Yonndé ti mo kréyol
Pou pé sa konsolé
Moun lapenn ka pijé
Pou kouraj yo trapé
Yonndé mo dou kréyol
Pou palé di lanmou
An pawol swa ki dou
Pou lé chou ek doudou
Yonndé gro mo kréyol
Pou lakolè monté
Pou nou pé sa kontré
lé mové malmaké
Yonndé bon mo kréyol
Pou pé sa rigolé
Lè kontè ka konté
Menm lè Bazil pasé
Yonndé bel mo kréyol
Dan plodwari nou fè
Pou pé défann an frè
Ki adan li malè
Yonndé vié mo kréyol
Fondok tradision nou
Dan péyi ki ta nou
Ka fè ki nou sé nou
Yonndé gran mo kréyol
Pou trasé dé lidé
Kon tonè ka woulé
Ek zéklè ka pété
Yonndé mo cho kréyol
Pou an tjè chaléré
Lè an kò maléré
Ek paré a pléré
Yonndé mo fò kréyol
Pou pé sa esprimé
Lapé ek lanmitjé
Pou tousa ki méwté
Yonndé twa mo kréyol
Pou sa di lafièwté
Di palé ek matjé
Lang-la ki nou simié
Daniel M. Berté 191018