— Par Daniel M. Berté —
Yo di kiw té an neg mawon
an neg ki pa bon
an vakabon
an mal-kochon
A! Papa-mwen… Sa pa ayen… Kisa moun pa ka di?!
yo di kiw té an madradjè
an kouyonnè
an kokè
an vòlè
A! Papa-mwen… Sa pa ayen… Kisa moun pa ka di?!
Yo di kiw té an malfentè
an neg mové manniè
an siwotè
an nèg douvan-dèyè
A! Papa-mwen… Sa pa ayen… Kisa moun pa ka di?!
Yo di kiw té an isenbòt
an neg-bèlòt
an Kòyòt
an neg-tjilòt
A! Papa-mwen… Sa pa ayen… Kisa moun pa ka di?!
Yo di kiw té an kochonni
an neg touni
an neg salopri
an neg radi
A! Papa-mwen… Sa pa ayen… Kisa moun pa ka di?!
Yo di kiw té an neg mové-sijé
an neg bonjou-pa-vré
an nèg dèyè-do-Bondié
an neg ki pa ka pléré
A! Papa-mwen… Sa pa ayen… Kisa moun pa ka di?!
Yo di kiw té an boloko
an grosomodo
an nèg-blo
an bitako
A! Papa-mwen… Sa pa ayen… Kisa moun pa ka di?!
Yo di kiw té an neg san grenn
an mal chen gro gren
an konkonm san grenn
an nèg an lapenn
A! Papa-mwen… Sa pa ayen… Kisa moun pa ka di?!
Yo di kiw té an vwayou
an boug fou
an neg mantou
an neg soubarou
A! Papa-mwen… Sa pa ayen… Kisa moun pa ka di?!
Yo di kiw té an kokangnè
an koubarè
an neg an wotè
an neg santi-la-souè
A! Papa-mwen… Sa pa ayen… Kisa moun pa ka di?!
Yo di kiw sé an neg san manman
an neg san santiman
an neg an manniman
an neg soukougnan
A! Papa-mwen… Sa pa ayen… Kisa moun pa ka di?!
Yo di kiw té an bonnawrien
an san-ayen
an neg lanmen-fèmen
an konpè lapen
A! Papa-mwen… Sa pa ayen… Kisa moun pa ka di?!
Yo di kiw té an neg modi
an neg piéni
an bonda-mézanmi
an neg Sentespri
A! Papa-mwen… Sa pa ayen… Kisa moun pa ka di?!
Mé yo bliyé di tou
kiw té ka pijé kow pou ba nou manjé-nou
kiw té ka ba Manman, lèw té ni, dé-twa sou
kiw té ka travay red jiska pété grenn-ou
kiw té ka défann-nou si moun té menyen-nou
Mé yo bliyé di tou
kiw té ka fouyé tè pouw planté yanm ek chou
kiw té ka ramennen sikdoj ek kakodou
kiw té ka bay koudmen pou neg kanmarad-ou
kiw té ka fè kalen pou té péché wasou
Mé yo bliyé di tou
kiw té ka pran ba nou zikak épi pwadou
kiw té toujou ba nou ti-kat sinéma-nou
kiw pa té ka ni tan di palé di lanmou
kiw pa té ka di sa, men ou té anmen-nou
A! Papa-mwen… Sa pa ayen… Sé kouto sel ki sav…
A! Papa… Man sé kouto…
Daniel M. Berté 030117
Priyè-palé pou papa
Pou pen ou partajé
Pou pwason ou péché
Pou prin ou pòté
An sel priyè-palé :
« Mèsi anpil papa !»
Pou patat ou planté
Pou pwa ou pliché
Pou poul ou plimé
An sel priyè-palé :
« Mèsi anpil papa !»
Pou pasaj ou préparé
Pou pawòl ou préché
Pou psòm ou prédjé
An sel priyè-palé :
« Mèsi anpil papa ! »
Pou pièj ou paré
Pou pitit ou protéjé
Pou pléré ou pansé
An sel priyè-palé :
« Mèsi anpil papa ! »
Pou pas ou pasé
Pou pal ou pòté
Pou pijé ou pijé
An sel priyè-palé :
« Mèsi anpil papa ! » Daniel M. Berté